grüesst Di
Dr Ueli
dr Ämmitauer Liedermacher vom Wase
'Ueli's liederlichi Wäut'
hie uf Youtube
Foto:
Foto-Session 2007
Mini musikalischi Wanderschaft hett ihre Afang 1974 aus Bassischt bim Duo CURRICULUM VITAE gno u hett mi nächhär über ds Bassspiu bi VACUUM u aschliessend bi PETER PAN & KLEOPATRA gfüehrt.
Irgendwenn ha nig de mau zur Gitarre griffe u 1993 hani eigeti bärndütschi Lieder afa schribe. Mit dr ÄMMITAUER BLUUS KLINIK hei die Songs während es paar Jahr dr Wäg zumene chlyne Publikum gfunge.
Nachdäm sich d’Ämmitauer Bluus Klinik ufglöst hett gha, hani de wider zum Bass griffe u n’es churzzytigs Experimänt gschtartet: DHARMAPHANK isch es Trio gsi mit Bass, Drum u Sax (inspiriert drzue hett mi d’Gruppe „Morphine“). Gspiut hei mir buddhistischi Mantre imene rockig-phankige Chleid.
Di nächschti, äbefaus churzzytigi Station si d’ PARADOGS gsi, wo nig ou dr Bass bearbeitet ha (dr Song „El Loco“ fingsch uf dr „didgeridoo compilation – Yidaki 2“).
Uf das abe bini de wider zrüggkehrt zu mine MundArt-Lieder u bi aus UELI solo ufträtte. Nachere längere Pouse hani de churz no mau dr Bass i d’Häng gno für d’Gruppe SYNERGIE u ha när UELI’S DIRTY MUNDART gründet für wider mini eigete Songs z’spiele. Aber scho nach wenige Uftritte hett sich d’Band trennt. Nume mit em Gitarrero Daniel Marti zäme hani när no e paar akustischi Sets im Duo gmacht.
2005 hani de UELI’S METANÖIART gründet. Zersch hei mir aus Trio gwürkt, när de no aus Quartett. Nach personelle Wächsle isch 2007 drus UELI’S SCHROT entstange u drmit ou ds erschte ziemlech bruchbare Tondokumänt: d’Demo-CD „UELI’S SCHROT: WACH UF!“ (die 15 Songs – gschribe i de Jahr 1993 bis 2006 – chasch gratis abelade unger „CD-MP3“).
Ueli’s Schrot mache im Momänt e Pouse, aber DR UELI isch spontan u solo ungerwägs uf Strasse u i Gasse, uf Hügle u i Wäuder, i Beize u i Gärte, i Stubene u uf Bühnine, wie’s sich äbe gäd ergit. Mängisch isch är ou nid ganz älleini u wird begleitet vo diesem oder äim Mitmusikant. Vor auem isch är immer ou gärn mit sinere innig gliebte u liebende Frou ungerwägs: zäme si si UODAL & LUCIENNE.